Abakiristu bo m’umujyi wa Kigali baratabaza nyuma y’uko basambanyijwe n’abapasiteri mubyumba by’amasengesho

Muri kimwe mu cyumba cy’ amasengesho mu Mujyi wa Kigali, gishashemo ubwatsi, inkuta ziriho inkorogoto zikomoka ku rufunzo, hagati harimo inkingi z’ ibiti, inyuma hariho shitingi, hasakaje amabati harimo kandi ameza ateretseho ingoma na buji yaka, niko imbere hari hateguye. Humvikanaga amajwi y’ abakirisitu bavuga mu ndimi zitumvwa na buri wese.

Hari abasengera mu byumba by’ amasengesho bitandukanye bemeje ko baharonkera agakiza n’ umuti w’ ibibazo bafite, abandi bagatunga agatoki bamwe mu bapasiteri ko babahohotera bakanabasambanya ku ngufu. Bamwe mu bagezweho n’ iri hohoterwa ntiboroherwa na gato no gutanga ubuhamya bw’ ibyababayeho.

Bavuze ko bashyirwaho iterabwoba n’ ababasambanyije bababwira ko uzabivuga azahura n’ akaga gakomeye.

Bamwe mu bakirisitu beruriye Radio Flash ko bafatiwe ku ngufu mu byumba by’amasengesho, n’ ubwo batoroherwa no gusobanura ibyababayeho.

Alicia (Izina ryahinduwe) yagize ati “Hari kuwa kane, ubwo twajyaga kureba pasiteri, nibwo twamusangaga mu biro bye […] Ndicara, ambaza ibibazo byinshi…, ndamusobanurira kugira ngo yumve impamvu y’ ikintu nshaka mbere y’uko ansengera. Nyuma gato nyine turahumiriza ari kunsengera.”

Alicia yakomeje atanga ubuhamya agira ati “Uko yansengeraga, akajya ansindagira, kumwe basenga batigisa abantu, akajya ansindagira ankorakora ahantu hose, nyuma y’aho aza kunsunika angusha hasi turakomeza turasenga, nza gushiduka ari kunsambanya.”

Ntabwo ari Alicia wenyine wahuye n’iki kibazo kuko hari n’abandi bagaragaza ko basambanyijwe muri ubu buryo, ariko bakerekana ko batifuza kubigarukaho kubera ibikomere byabateye ku mutima, ahubwo bagahitamo kuburira abandi bana b’abakobwa bagana ibyumba by’amasengesho.

Olivia (Undi mukobwa wahinduriwe izina) mu ijwi ryuje ikiniga, ugaragaza ko yashunguwe bikomeye n’ibyamubayeho, yagize ati “ Njye ntekereza ko uriya mugabo yari afite imyuka mibi akoresha si gusa,… Nyabuneka abana b’abakobwa mwitwa ngo muri mu nsengero…(yumiwe).”

Bumwe mu buryo bavuga ko bukoreshwa n’ abapasiteri bashaka kwiyegereza umugore cyangwa umukobwa babengutse mu cyumba cy’ amasengesho bayoboye, ngo ni ukumuhishurira ubuhanuzi bw’ ibinyoma, bakamwumvisha ko akeneye amasengesho yihariye kugira ngo ibibazo afite bikemuke nk’ uko abo byabayeho babitanzemo ubuhamya.

Ku bapasiteri bamwe ngo gusambanya abakirisitu si bishya

Bishop Charles Rwandamura ukuriye itorero ry’ ubumwe bw’ abakirisitu, UCC, akanayobora ihuriro ry’ amatorero yiyomoye kuba pantekote, asanga kwitwa pasiteri ntaho bihuriye no kudasambana.

Yagize ati “None se kwitwa pasiteri bivuga kudasambana? Oya. Kuko tumaze kubona ko abantu babyiyita ariko bambaye ibindi, kugira ngo bonone ikizima. Abazima barahari, ariko n’ ibyo birahari bifite imbaraga.”

Bishop Onesphore Rwaje ukuriye itorero ry’ Abangilikani mu Rwanda , we aziko gusambanya abakirisitu bibaho, ariko ngo binyuranye n’ ijambo ry’ Imana.

Yagize ati “Ndabyumva, uko guhohotera kurimo gufata ku ngufu, kwitwaza ngo umuntu arahanuye, agahanura ibijyanye no guhungabanya abantu, ntabwo ijambo ry’ Imana ribyemera.”

Ibyumba by’ amasengesho bishobora gufungwa

Komisiyo y’ Igihugu Ishinzwe Uburenganzira bwa Muntu ivuga ko ifite ibimenyetso byerekana ko mu byumba by’ amasengesho hari benshi basambanywa n’ abapasiteri, bityo ibi byumba ngo bishobora gusabirwa gufungwa.

Komiseri muri iyi Komisiyo, Me Laurent Nkongoli, yagize ati “Ahubwo komisiyo nayo aho bukera irafatanya n’ abayobozi kugira ngo n’ ibyo byumba by’ amasengesho binafungwe. Kuko ikibazo cyo gufata abagore n’ abakobwa ku ngufu, hari anketi turiho dukurikirana y’ uko ibyo bintu bihakorerwa kandi dufite ibimenyetso, ubuhamya bw’ abahafatiwe ku ngufu.”

Ngo abatanga ibirego by’uko bahohotewe mu nsengero ni bake

Imibare igaragaza ko abatanga ibirego bavuga ko bahohoterewe mu byumba by’ amasengesho atari benshi, n’ ubwo ngo bitavuze ko umubare w’ abakorerwa iri hohoterwa ari muto.

Umuyobozi w’ishami rishinzwe kurwanya ihohoterwa rikorerwa mu ngo n’irikorerwa abana muri Polisi y’igihugu, SP. Belline Mukamana avuga ko hari ikirego cy’umupasiteri wasambanyije abakirisitu bigeze gukurikirana.

Yagize ati “Icyo kintu tujya tucyumva, hariho nk’ ikirego twigeze gukurikirana muri 2011, cy’ umupasiteri wasambanyije abana, atera abana batatu inda, ariko yari yarasambanyije abagera ku icumi. Uwo yahanwe n’ amategeko.”

Abujuje imyaka y’ubukure ngo nibo batanga ibirego by’uko basambanyirijwe mu nsengero

Umuvugizi w’ubushinjacyaha bw’ u Rwanda, Alain Mukurarinda, avuga ko abakirisitu basambanywa kubera ububasha ahanini usanga Pasiteri cyangwa Padiri afite ku mukirisitu we.

Yongeraho ko guhoza umuntu ku nkeke kubera ububasha umufiteho bihanishwa igifungo kuva ku mezi atandatu kugeza ku myaka ibiri, n’ ihazabu y’amafaranga kuva ku bihumbi ijana kugeza ku bihumbi magana abiri.

N’ ubwo nta bushakashatsi bwihariye bwakozwe kuri iki kibazo ndetse n’ abasambanywa muri ubu buryo bakaba bakunze kubigira ibanga rikomeye, ibyumba by’ amasengesho byakunze kuvugwaho gukorerwamo ubusambanyi.

Hari n’amakuru yatangajwe ko i Rubengera mu Karere ka Karongi, aho mu cyumba kimwe cy’ amasengesho havuzwe icyiswe “Kumarana irari”, aho ngo umwe mu bahanuriraga muri icyo cyumba yasabye abakirisitu kumarana irari bakoranaho, akagenda ababwira uko babigenza kugeza ubwo bisanze baraye bakora imibonano mpuzabitsina.

Leave a Reply

Your email address will not be published. Required fields are marked *