Ibihano biravuza ubuhuha mu ikipe ya Rayon Sports kubera ibyabaye k’umunsi wa gatanu wa shampiyona.

Akanama gashinzwe imyitwarire mu Ishyirahamwe ry’Umupira w’amaguru mu Rwanda kateranye kiga ku mvururu zabaye ku mukino w’umunsi wa gatatu wa Azam Rwanda Premiere Legue, ubwo Sunrise yakiraga ikipe ya Rayon Sports.

Bimenyimana Bon Fils Caleb wakubise umugeri umufana wari winjiye mu kibuga, aka kanama kateranye kemeza ko ikosa yakoze agomba kuriryozwa, kamufatira ibihano byo gusiba imikino ine adakandagira mu kibuga, agatanga n’ihazabu y’amafaranga ibihumbi 80 by’amafaranga y’u Rwanda.

Si umukinnyi gusa wafatiwe ibihano kuko n’ushinzwe ibikoresho mu ikipe ya Rayon Sports, Dushimimana Claude we yahagaritswe umwaka wose kandi agatanga ihazabu y’ibihumbi 50 by’amafaranga y’U Rwanda.

Ikipe ya Sunrise yari yakiriye uyu mukino wagaragayemo imvururu, yahanishijwe kuzakira umukino ukurikira nta mufana n’umwe ukandagiye muri sitade y’iyi kipe izwi nka Mabati.

Bimenyimana Bon Fils Caleb ahawe ibi bihano nyuma yo kuba akomeje kurangwa n’imyitwarire mibi kuko no ku munsi w’ejo ku mukino wahuzaga Rayon Sports na Kiyovu Sports warangiye ahawe ikarita y’’umutuku kubera gushyamirana n’umusifuzi.

Amakipe yose arebwa n’iyi myanzuro yasabwe gukurikiza iyi myanzuro akimara kubona iri tangazo. Caleb azasiba umukino wa AS Kigali, APR , AS Muhanga na Espoir. Caleb ahawe ibi bihano mu gihe no kumukino ikipe ye ya Rayon Sports yaraye itsinzwe na Kiyovu nabwo yabonye ikarita y’umutuku ubwo mu gihe nayo yakomeza kubarwa yazasiba n’umukino wa Polisi FC.

Leave a Reply

Your email address will not be published. Required fields are marked *