Izi nizo mpamvu nyamukuru zitera abagore kwibuka guca imyeyo bakuze >>>Inkuru irambuye

Mu gihe bitangazwa ko umuhango wo kujya mu rubohero/ Gukuna cyangwa se Guca imyeyo, bikorwa n’abakobwa batangiye ubwangavu, ku myaka 12 na 13, hari bamwe mu bagore bibuka kubikora bakuze.

Hari abibuka kubikora igihe cyarabarenze ntibibe bigishobotse, hari ababikora ingo zabo zararangije gusenyuka, kimwe n’uko hari abagira ipfunwe ryo kubigishaho inama cyangwa kubikora babona abana babo aribo bageze igihe cyo kubikora.

1.Amahirwe make yo kubimenya: Hari abantu bagiye bakurira mu bihugu bitita kuri uyu muco wo gukuna kuko ukunze kugaragara mu Rwanda n’ibindi bihugu bituranye narwo, aba ntabwo baba baragize amahirwe yo gusobanurirwa ndetse no kwigishwa ku gikorwa cyo Gukuna, cyangwa Guca imyeyo nk’uko bamwe babyita.

Hari n’abandi babyirukira mu Rwanda, ariko bitewe n’ababyeyo cyangwa se abandi babareze, nabo ntacyo bitayeho cyangwa n’abo ubumenyi kuri iyi ngingo ntabwo babifiteho, ugasanga nawe urinze ukura utazi Gukuna, wagira amahirwe ukabimenya ukuze, bityo ukabitangira ubwo.

Birashoboka ko n’imyemerere ishobora gutuma umuntu arinda akura atarakuna, ukabyirukira ahantu bakubwira ko kizira, ko bibujijwe bitewe n’uko ngo uba ushaka kwihindura uko Imana itakuremye, Gukuna bikagereranywa no Kudefiriza ku bagore, kwihindura uruhu ukoresheje amavuta, kwipfumuza amatwi n’amazuru, guhinduza inzara,…

Niba wibaza uti ‘ese gukuna ni Iki? Bikorwa bite? Kanda hano ubanze usobanukirwe

2.Intyuro z’umugabo: Abagore benshi bashaka batarakuna, ku bw’ibyago agasanga umugabo azi iby’uyu muco wo gukuna cyangwa se Guca imyeyo. Iyo bagishakana usanga umugabo yiyorobetse ariko amwibikiye.

Iyo bamaze kubyarana nka kabiri, nibwo atangira kumucyurira, akamubwira uburyo atameze nk’abandi, ko yarezwe nabi, mbese bikaba intambara.

Ahangaha, ageraho akerura akakubwira ko mu gihe cyose uzaba utaraca imyeyo, ko tayari azajya yigira ahandi, akaguha integuza yo kuguca inyuma. Kandi koko birakorwa abagabo bagaca inyuma abagore babo babaziza, kudaca imyeyo, kutagira amavangingo,…

Aha, usanga umugabo aba ashinja umugore kutamunezeza mu gihe cy’imibonano mpuzabitsina, ko ikibitera ari uko ataciye imyeyo, ko atanyara mu gihe cy’imibonano kandi ahanini kunyara bidaterwa 100% no kuba umugore yarakunnye n’ubwo bwose bishobora kunganirana.

3.Gutinya kwisenyera: Ushobora kuba warabyirukiye mu muco utemera uyu muco, cyangwa se nawe ubwawe wumva bitari bikurimo kuva mu bwana bwawe ko wajya mu rubohero, ariko nyuma yo gushaka umugabo ugatangira kumenya ukuri, wabona umugabo abikunze ukemera ukabikora.

Bitewe n’amahane uba ubona umugabo afite kuri iyi ngingo, uremera ugashaka uburyo ubigeraho, bigoranye kandi bikaba, hari n’igihe usanga imyaka yaragusize cyangwa se ibiro bitakikwemerara kwihina ngo ukore iki gikorwa.

Hari n’ababa bafite impungenge z’uko Gukuna bamaze kubyara bitashoboka, birashoboka cyane, ahubwo ubushake umuntu abishyiramo nibwo bushobora kumufasha kugera ku musaruro yifuza.

4.Guterwa imbaraga n’abana: Iyo abana batangiye kugera mu myaka 12 cyangwa 13, batangiye kugira byinshi bamenya ku buzima bw’imyororokere cyangwa barabyigishije ku mashuri, nibwo umwana w’umukobwa ashobora kubikubazaho.

Iyo abikubajije utarabikoze kandi ubona abikuze, bigutera ipfunwe, bikagusaba kubanza ukamenya uko bikorwa n’akamaro kabyo, aha na we ushobora guhita ufatiraho, ukabanza kubikora mbere y’uko nawe utangira kumufasha kubikora.

5.Kubiratirwa: Aho abagore bicaye, bakunze kugaruka cyane ku buzima bwabo bwite, rimwe na rimwe bakanaratirana n’amabanga yabo yo mu buriri, cyangwa se bakagaruka ku nkuru za bagenzi babo, n’uburyo babanye n’abagabo babo.

Iyo bageze kuri iyi ngingo yo gukuna, bamwe bavuga ibyiza byayo mu kunezeza abagabo, usanga wawundi utarigeze agera mu rubohero bimutera ipfunwe, akaba yaryumaho cyangwa se akababaza, aha bamuha urw’amenyo nawe akahakura isomo, ni kimwe n’umugabo utarigeze yisiramuza, nawe atinya kubivuga mu bandi.

Icyo gihe nta kabuza, atangira ubwo ashakisha uburyo yagera kuri ayo mahirwe atitaye ku myaka afite. Bamwe babifata nk’umuco w’abatari abanyamujyi, ariko iyo umuntu ageze mu rwe, amaze gushaka nibwo atungurwa.

Leave a Reply

Your email address will not be published. Required fields are marked *