Minisitiri w’Uburezi yatahuye ibibazo by’ingutu biri mu burezi birimo n’abarimu badashoboye bitabaza bagenzi babo ngo babigishirije.

Hashize iminsi humvikana inzindukano zitandukanye za Minisitiri w’ Uburezi Dr. Mutimura Eugene wasuye ibice bitandukanye by’igihugu, asuzuma uko uburezi bukorwa ndetse n’uko bwifashe, yewe yagiye ahasanga ibibazo bitandukanye bimwe bituruka ku banyeshuri ariko cyane cyane abarezi basanzwe ari bo ba nyirabayazana mu migendekere mibi y’uburezi bwifuzwa, ari na byo byatumye hari abarezi cyangwa abayobozi b’ibigo by’amashuri bagiye bafatirwa imyanzuro y’umwihariko ngo barusheho kujyana n’abandi.

Uyu muyobozi kandi yasuye Akarere ka Nyamasheke azenguruka muri bimwe mu bigo by’amashuri avuga ko yahasanze ibibazo byinshi kandi birimo iby’ingutu birimo ibyo kuba muri aka karere abana baho bakunze gukererwa ishuri ndetse abandi bakarivamo, ngo yahasanze kandi n’ ikibazo cy’abarimu badashoboye aho usanga umwarimu wigisha isomo ariko yagera hagati agasanga hari bimwe mu bice bigize iryo somo (Chapitre) atumva neza akajya gushaka undi mwarimu uyimwigishiriza.

Ubwo Minisitiri Mutimura yasuraga aka karere ku wa 20 Nzeri 2018, uwo munsi bamwe mu bayobozi b’ibigo by’amashuri n’abashinzwe uburezi muri aka karere ka Nyamasheke bavuze ko impamvu zitera abana gukererwa cyane ndetse no kuva mu ishuri harimo kuba biga ahantu kure .

Umuyobozi w’ikigo cy’amashuri abanza cya VERO Madame Nyiranzeyimana Vestine we yavuze ko ikigo ayoboye kuva ku cyumba kimwe cy’ishuri ujya ku kindi harimo intera ya metero 500 ndetse hakaba hari n’ibindi byumba byubatswe ahandi byigiramo abana kuva mu mwaka wa mbere kugeza mu mwaka wa gatatu giherereye ku ntera ya kilometero irenga kandi aha hose akaba ahayobora ari wenyine bityo ko gukurikirana imyigire y’abana bitakoroha ndetse hakaba hari nubwo abana bagorwa n’urugendo bakora bagahitamo kuva mu ishuri bakajya kuroba mu kiyaga cya Kivu.

Ku rundi ruhande abarezi bo mu karere ka Nyamasheke bagaragarije Minisitiri w’uburezi ko hari ibura ry’ ibitabo byo mu mwaka wa gatandatu w’amashuri abanza n’umwaka wa gatatu w’amashuri yisumbuye, abarimu bigisha muri iyi myaka bavuga ko ibi bitabo by’integanyanyigisho muri gahunda nshya izwi nka CBC (Competence based curriculum) bitigeze bigezwa mu bigo by’amashuri kandi ari byo abana bagomba kwigiramo, aba barimu bakagaragaza ko ibura ryabyo rishobora kugira ingaruka ku banyeshuri bitegura ikizamini gisoza umwaka w’amashuri barimo.

Gusa igiteye urujijo ndetse kitumvikanweho ni uko Minisitiri w’uburezi atemeranya n’abavuga ko ibi bitabo byabuze kuko ngo byagejejwe ku bigo byose ahubwo ko icyahindutse ari uburyo bw’imyigishirize. Minisitiri Mutimura yavuze ko uretse no kuba abarimu barahawe ibi bitabo mu bigo by’amashuri hagiye hashyirwamo interineti ndetse na za mudasobwa ku buryo abarimu bakwifashisha ubu buryo bashakashakisha amasomo yo kwigisha abana.

Ku kibazo cy’abanyeshuri bata amashuri cyakunze kugaragara mu duce dutandukanye tw’igihugu, muri rusange aka karere ka Nyamasheke habarurwa abana 2591 bataye ishuri ariko ngo muri uku kwezi bamaze kugarura abagera 1453 bo mu mashuri abanza ndetse na 402 bo mu mashuri y’isumbuye, bivuze ko abagera kuri 736 batabasha gusubizwa mu mashuri.

Leave a Reply

Your email address will not be published. Required fields are marked *