Mwiseneza Josiane yabonye imodoka nziza cyane yo kujya imutwara, ndetse n’ushinzwe umutekano we. (Amafoto)

Irushanwa rya Miss Rwanda si rishya mu matwi y’abantu yewe imyaka ibaye uruhererekane rikorwa ariko iry’uyu mwaka wa 2019 ryazanye indi sura byose biturutse ku mukobwa twavuga ko adasanzwe wakunzwe bihebuje yewe uwavuga ko yavugishije imbaga ntiyaba abeshye! Uwo mukobwa nta wundi ni Mwiseneza Josiane ukomeje gutungurana mu buryo budasanzwe ugereranyije n’uko byari byitezwe. Nyuma ya byinshi uyu mukobwa yavuzweho birimo kuza kwiyamamaza akaza n’amaguru ndetse akanakomereka, yarakunzwe karahava ku bw’umurava we n’ubudasa yagaragaje muri iri rushanwa ryo gutoranya Nyampinga w’u Rwanda 2019. Mu gutungurana kwe rero bisa n’ibimaze gufata indi ntera dore ko ubwo hatoranywaga abakobwa 20 bagomba kujya mu mwiherero wa Miss Rwanda 2019, na none Mwiseneza yatungiranye arindiwe umutekano ndetse ataha mu modoka nziza ya Toyota TXL afite n’umurinzi
Iyi modoka Mwiseneza Josiane yatashyemo yarimo n’umurinzi wo kumurikirana yamukuye kuri Expo Grounds i Gikondo imugeza aho asigaye acumbitse kwa musaza we utuye ku Ruyenzi. Mwiseneza yatangaje ko iyi modoka atari iyo yashatse nk’uko benshi babikeka ahubwo ngo bishoboka ko abantu bamuhaye iyi modoka ari abashakaga ko atongera kugenda n’amaguru.
Imodoka Mwiseneza Josiane yatashyemo.
Yagize ati: “Nanjye nabonye imodoka nyigendam ibindi ntabyo nzi, yarantwaye ingeza mu rugo. Gusa yaje nyuma y’uko abantu bari kunsagarira bagatuma ntisanzura baje rero bashaka kumpuza n’umuryango wanjye no kunkura muri abo bafana bari banyatatse banze kundekura. Buriya ni umuntu wavuze ati ‘atongera kugenda n’amaguru’ aritanga.” Mwiseneza yakomeje avuga ko icyo uyu murinzi yakoze ari ukumuhuza n’umuryango we wari watatanye kubera umuriri w’abafana bashakaga kumugumana. Josiane rero akaba yaratahanye n’umurinzi wa B-KGL isanzwe ikora akazi ko gukurikirana ibijyanye no kurinda umutekano w’abahanzi batandukanye no mu bitaramo.
Mu gushaka kumenya mu by’ukuri imvano y’iyi modoka, Igihe begereye musaza wa Mwiseneza Josiane witwa Muhayimana Samuel, atangaza ko imodoka yabatwaye yaturutse ku bagiraneza bahisemo kuyimuha kugira ngo atazongera kugenda n’amaguru. Yagize ati:
“Afite abantu bamuteye inkunga bavuga badashaka kongera kumubona agenda n’ibirenge, bavuga ko bagomba gushaka imodoka nziza imutwara ikamugeza ahagomba kubera irushanwa ikanamucyura. Ririya ni itsinda ry’abantu bishyize hamwe bahitamo kumukodeshereza imodoka.”
Muhayimama yashimangiye ko imvano y’umurinzi wa Josiane nta kindi kidasanzwe uretse kamwikubwira ko agiye kujya amuba hafi. Yagize ati:
“Umurinzi we ni umuntu wamwikundiye, yanamuhamagaye bikiri mbere ati ‘njye ndagufana’ ndashaka ko nta muntu uzajya agutezaho akavuyo adatuma wigendera neza njye nguhaye umusanzu wo kugira ngo nzakubere umurinzi nk’uko mwabonye.”
Yakomeje avuga ko mu gihe cyo kuva ahari habereye ijonjora rya Miss Rwanda abantu bamwe bamubonanye [musaza wa Josiane] n’uwo murinzi bakavuga ko afite abarinzi babiri. Ati:
“Ngira ngo dutaha benshi banabonye ndi kumwe na Josiane n’uwo murinzi bavuga ko afite abarinzi babiri ariko yari umwe wari wamukunze nanjye musaza we.”
Ku rundi ruhande Ariko yaba Josiane ndetse n’uyu musaza we, bashimangira ko n’ubwo hari benshi bashimira ariko banemeza ko hari n’abaterankunga ba baringa dore ko n’ubwo yumvikanye benshi bamerera inkunga Josiane ariko ngo ababishyize mu bikorwa ni mbarwa. Ibi bigatuma Josiane hari abibwira ko yaba amaze kwigwizaho imitungo n’agafaranga ariko ngo si byo, byinshi byaheze mu magambo. Tubibutse ko ko ku wa 05 Mutarama 2019, ari bwo abakobwa 37 bakuwemo 20 bagomba kujya mu mwiherero, barimo na Mwiseneza Josiane wari mu bahanzwe amaso, anakunzwe bidashidikanywaho ugereranyije n’abandi muri iri rushanwa. Mwiseneza yanaje mu bagomba kujya mu mwiherero abikesheje kwanikira abandi mu buryo bw’amajwi yo ku mbuga nkoranyambaga.

Leave a Reply

Your email address will not be published. Required fields are marked *

Loading...