Uburyo bwitwa HIV Self Test bwaje ari igisubizo kubanya-Rwanda ubu ushobora gukoresha ubu buryo ukipima SIDA kugiti cyawe ukoresheje amatembabuzi yo mukanwa

Ikigo cy’igihugu gishinzwe ubuzima, RBC cyemeje burundu gahunda igamije gufasha abantu bose kwipima Virusi itera SIDA bitabaye ngombwa ko bajya ku mavuriro ngo bapimwe n’abaganga,bakoresheje agakoresho kitwa ‘OraQuick’.

Ubu buryo bwitwa HIV Self Test (Kwipima Virusi itera Sida), bwatangiye igeragezwa mu Rwanda tariki ya mbere Ukuboza 2017, ubu abasaga 5700 bakaba ari bo bamaze kubukoresha.

Dr. Sabin Nsanzimana, umuyobozi w’ishami rishinzwe indwara zo mu maraso harimo na SIDA,yagize ati: “hari abantu bamwe na bamwe bajyaga bagira impungenge zo kwipimisha kubera ko babaga bumva  ko ababapimye bashobora kutagira ibanga ry’ibisubizo byabo bagahitamo kutajya kwipimisha bityo ubwandu bwa Sida bugakomeza gukwirakwizwa akaba ariyo mpamvu twashyizeho uburyo buri wese azajya yipima ndetse akaba yanamenya igisubizo cy’ubuzima bwe nta wundi muntu ubimenye.

Ikindi ubu buryo buzafasha benshi cyane ko hari n’abajyaga banga kujya kwipimisha bitewe no kubura umwanya nko kubantu bagira akazi kenshi  nyamara bakeneye iyi serivisi bakazajya bipima bonyine bakamenya uko bahagaze.”

Udukoresho twifashishwa muri ubu buryo turi mu gapaki kanditseho OraQuick, agapaki kaba karimo udukoresho twifashishwa ndetse n’amabwiriza asobanura intambwe ku yindi uwipima akurikiza, aya mabwiriza akaba ari mu ndimi eshatu:  Kinyarwanda,icyongereza n’Igifaransa.

Ubu buryo bwo kwipima bukorwa bute?

Ubu buryo buzajya bukoreshwa umuntu afata iki gipimo akakinyuza ku ishinya yo hejuru n’iyo hepfo agenda anyuza hagati y’aho ishinya n’amenyo bihurira yarangiza agategereza iminota 20 agahita abona igisubizo, ariko bigasaba ko umuntu yirinda kugira icyo yarya cyangwa kunywa mbere  y’iminota 15 ngo yipime.

RBC ivuga ko Farumasi 20 zo mu mujyi wa Kigali ari zo zitangiranye n’iyi gahunda kandi ko zabihuguriwe, mu gihe kiri imbere gahunda ikazagenda yaguka bijya no mu zindi farumasi hirya no hino mu gihugu aho igipimo kimwe kigura  4000Frw.

Kugeza ubu 3% by’abanyarwanda ni bo bafite virusi itera Sida nk’uko byagaragajwe n’ubushakashatsi ku buzima (DHS) bwa 2015, gahunda zirimo gukoresha agakingirizo, gukebwa no kwifata zikaba ziri mu zishyirwa imbere mu rwego rwo kurandura burundu ubwandu bushya bwa Sida bitarenze umwaka wa 2030 nk’uko Minisiteri y’ubuzima yabyiyemeje.

Leave a Reply

Your email address will not be published. Required fields are marked *

Loading...