Yooo! Ihorere kibondo! Mbega agahinda! Ari nka we wamusubiza iki akubajije atya koko?

Muri ibi bihe, iminsi igenda irushaho guhindagurika no kuzana ibyayo ibyinshi ugasanga ari ibitabwa aho guhabwa intebe nk’uko tubibona, amaherezo azaba ayahe?

Mu kinyarwanda bati uwima umwana aba yimye umukungu kandi ngo utazi agakura yica umutavu. None uru rubyaro aba bato ko ari bo Rwanda rw’ejo umwanya tubaha mu buzima bwacu nk’ababyeyi ungana nk’ababyeyi by’umwihariko ndetse n’abandi bafite mu nshingano zabo kubitaho?

Mu gushaka gukebura buri wese mu ruhande rwe no kurushaho kubaka umuryango uboneye, ityazo twifuje kubagezaho iyi nkuru y’ikiganiro gito umwana muto cyane yagiranye n’umubyeyi, byakoze ku mitima ya benshi kandi twifuza ko wowe uzayisoma izagusigira isomo ndetse ukarisangiza n’abandi.

Umwana w’imyaka ine, itanu gutyo yegereye mama we, aramubaza ati:

“Mama kuki isakoshi yawe irimo amafaranga cyangwa utundi dukoresho witwaza utajya udusigira umukozi?”

Mama we aramusubiza ati:

“Biriya ni ibintu by’agaciro cyane sinabisigira umukozi”.

Umwana arongera aramubaza ati:

“None se mama, kuki usiga ufunguriye umukozi igikoni ariko icyumba cy’ibintu ukagifunga ndetse n’icyumba cy’uburiri ukagifunga wagiye ukimusigira?”

Ni uko umubyeyi aramusubiza ati:

“Mwana wanjye rwose ibintu by’agaciro sinshobora kubisigira umukozi.”

Umubyeyi akimara gusubiza ayo magambo ako akana amarira abunga mu maso, n’agahinda kenshi karihangana karongera karamubaza karamubaza kati:

“None se mama, njye ko unsigira umukozi ubwo hari agaciro mfite?”

Umubyeyi akimara kumva ibyo umwana amubajije yabuze aho akwirwa atangira kumusaba imbabazi no kumuhumuriza kuko yari abonye ko umwana amwibukije ikintu gikomeye mu buzima.

Mbese mu buzima bwacu muri rusange ni iki gifite agaciro? Ni ko tugiha se cyangwa ahubwo hari ibyadupfukiranye by’iyi si binashira vuba bituma tutita ku by’agaciro koko? Buri wese yibaze nibimukundira atange n’ibisubizo uko abishobojwe.

Niba aka gakuru ugakunze kandi kakaba kagukoze ku mutima wibyihererana kageze no ku bandi!

Leave a Reply

Your email address will not be published. Required fields are marked *

Loading...